Eplerespekt i kvar gylne dråpe

Sidersmaking: Sider frå Hardanger har Beskytta Geografisk Nemning, og finst i stort utval. Ei rekkje produsentar byggjer opp si merkevare frå Hardanger. (Foto: Utne Hotel/Ida Marie Skeie)


Siderbøndene er på stigande rus, og reiselivet blir med på festen.


Anne Rivenes, frilansjournalist


Målet er ein million liter i 2025 – ei femdobling frå i dag.


– I 2016 vart det lov å selje sider frå garden, og næringa opplevde ein veldig vekst. Me snakkar 345 prosent auke på to år. Utviklinga er verdt å ta vare på, også fordi siderveksten får med seg fleire næringar, seier Kjetil Widding. Han er dagleg leiar i Siderklynga i Hardanger, men også vertskap på historiske Utne Hotel saman med Bente Raaen Widding.


Utne Hotel satsar mykje på siderturisme, med eigen sidersmaking, siderpakker til middagen og sider i matlaginga.


– Gjestene blir overraska over kvalitet og utval. Før var det vanleg å lage sterk, søt sider. No ser me at sider med seks-åtte prosent alkohol er den som gjev mest honnør til eplet. Dagens sider har gjerne eit turrare tilsnitt og meir eplesmak, seier Kjetil Widding.