Importeplet er hardaste konkurrenten

Fruktdyrking er i framgang fleire stader i sør-Noreg, og epla frå Sogn tek sin del av marknadsveksten.


Anne Rivenes, frilansjournalist


Nye rader med epletre skyt opp både i Hardanger, Ryfylke, Telemark og Lier, men ved Sognefrukt i Leikanger er dei ikkje redde for konkurranse frå andre epledistrikt.


– Alle prøver sjølvsagt å vera best, men me opplever ikkje hard intern konkurranse. Den store konkurransen er eigentleg mot importfrukt, seier Jens Terje Hammervoll i Sognefrukt.


– Mottaka er samkøyrde og samarbeider godt. Ikkje konkurrerer me om marknadstilgang heller, for det er meir eller mindre kjedestyrt. For vår del er produsentmiljøet medlem av Gartnerhallen, som har leveringsavtale med Bama, og tek seg av alt salet. Det same gjeld Hardanger Fjordfrukt, pakkeria i Innvik, Telemark og Lier. Fem pakkeri leverer til same system, som har eit meir eller mindre styrt uttak, forklarer Hammervoll.