Kalvemønstring på Dyrsku'n

Torsdag kveld var fleire av kalvane og eigarane deira allereie på plass på Dyrskuplassen. Dei hadde god tid og plass til å vaska og stella dyra sine etter den lange transporten.
Johan Aarsland har mønstra både ku og kalv i mange år. Tolvåringen har også vore med resten av familien til Seljord heilt sidan han var liten. I år hadde han med seg kalven Amalie.
Kalvane er vaska og pussa. Både kalvar og mønstrarane deira skal ha seg ein god natts kvil før sjølve mønstringsdagen. F.v. Magnus med Stjerne, Amalie med Anine, Heidi med Tone og Malin Regine med Klara.
Malin Regine har brukt mykje tid på Klara, som er av rasen Vestlandsk Fjordfe.
Fredag morgon kjem det stadig fleire kalvar og forventningsfulle barn og ungdommar som gjer siste finpuss på kalvane sine før dei skal mønstra dei i ringen.
Heidi og Amalie har plassert kalvane sine saman med kyrne ute på graset. Dei tek seg tid til litt frukost og ein oppdatering på siste nytt på telefonanen.
To flotte kalvar som har fått ein ekstra fin detalj, eit hjarte markert på låret på begge kalvane.
Det er viktig med detaljane. Ein kan ikkje gjera ting halvvegs dersom ein har ambisjonar om å nå til topps i den harde konkurransen.
Kalvar på rekke og rad. Lite veit dei om kva dei er med på, men dei har tillit til eigarane sine, og oppførerer seg deretter.
Ein av dei minstre mønstrarane, seks år gamle Eirik frå Heddal, saman med kalven Lisa. Eirik og Lisa hadde full kontroll, og vart til slutt kåra som nummer tre i klassa for barn frå ti år og yngre.
Ein sterk innsats også av Ola, med kalven Ola Ola. Ola er seks år og kjem frå Ulefoss.
Andrea er fem år og kjem frå Flatdal. Ho hadde med seg ein oksekalv av rasen Dexter. Kalven har fått navnet Lille Jack. Andrea og Lille Jack gjorde ein flott innsats i ringen.
Ni år gamle Kristine og kalven Tinkerbell, hadde spesielt god kontakt. Tinkerbell fulgte Kristine, som hadde et lite triks i å la kalven få suge litt på fingrane innimellom. Kristine og Tinkerbell kom på andreplass i si klasse.
Gisle er fem år, og hadde med seg telemarkskalven Nils Frode, til Seljord. Trass ung alder både på Gisle og Nils Frode, klarte dei seg heilt strålande i ringen.
Dei to dexterkalvane var frå same besetninga i Flatdal. Til venstre er Ragnhild med kvigekalven Sara, til høgre står Andrea med oksekalven Lille Jack.
Det var ei utfordring for dommaren å kåra dei første tre plassane. Dommar Anna Kirstine Aarsland, gjorde ei grundig vurdering, og merka seg dei som hadde god kontakt med kalvane, og samstundes hadde eit godt auge til dommaren. Eirik Bergland Mælandsmo, 6 år, med kalven Lisa, og storesøster Kristine, 9 år, med kalven Tinkerbell, kom på 3. og 2. plass i mønstringa. Eirik og Kristine er frå Heddal.
Sandnesjenta, Amalie Dyvik, 11 år, gjekk heilt til topps saman med kalven Anine. Dommaren ga Amalie skryt for at ho hadde full kontroll på Anine, sjølv kalven kan vera litt "litt turbo".
Skifte mellom klassane, dei yngste skal ut av ringen, medan dei eldste skal inn. Ingeborg og kalven Rosa er på veg inn i ringen.
Oppstilling på rekke, før dommaren ber mønstrarane om å bytta kalv. Dommar Anna Kirstina såg at enkelte kalvar var litt vanskelegare å få til å gå enn andre, kan hende berre fordi dei hadde ein dårlegare dag.
Liv Moen Dalviken er 11 år og kjem frå Heddal. Ho hadde med seg kalven Minni. Då dei fekk beskjed om å bytta kalv, fekk Liv gå med kalven Blanka. Det var ikkje noko stor utfordring for Liv, som mønstra heilt perfekt både med Minni og Blanka. Liv hadde trena på å gå baklengs meda ho leia kalven.
Malin er 14 år og kjem frå Heddal. Ho og kalven Stina er eit godt team, og Malin hadde full kontroll heile tida.
Mønstrarane har fått tilbake sine eigne kalvar, og ventar på dommaren si avgjersle. F.v. står Heidi Skårland (11), Magnus Aarsland (14) og Malin Regine Fotland Øglænd (11), alle frå Rogaland.
Ei fin rekke med flotte bunadar og stasklede, og nyflidde kalvar.
Liv Moen Dalviken (11) frå Heddal kunne sleppa jubelen laus, då ho og kalven Minni fekk utdelt 3. premie for den fine mønstringa. - Eg plukka ut den kalven som kom til meg, og som var nysjerrig på meg då eg kom ei fjøset, seier Liv. Ho og Minni har trena om lag ein månad i forkant av Dyrsku'n.
På andre plass kåra dommaren 11 år gamle Malin Regine Fotland Øglænd frå Time. Kalven Klara er ein vestlandsk fjordfekalv, som gjekk lenge i lag med mora. Malin Regine har brukt mykje tid på å få kalven til å trivast med grime og mønstring.
Til slutt var det Heidi og jerseykalven Tone, som stod att som vinnar av klassen frå 11 år og oppover. Heidi var jublande glad for sigeren. Ho hadde eit håp om å vinna, men visste at det var mange andre som også hadde trent lenge og som hadde god kontroll på kalven sin.

Ein festdag for både folk og fe

Liv Kristin Sola

25 forventningsfulle barn, kledd i sin finaste stas. 25 kalvar, vaska og klippa. Foreldre og besteforeldre på sidelinja. Sol og varme. Alt låg til rette for ein flott dag på Dyrsku’n på opningsdagen.

Barna vart delt i to klassar, 10 år og yngre og 11 år og eldre. Kalvane var godt trena og dei fleste oppførte seg eksemplarisk i ringen. Enkelte var nok litt prega av varmen og var ikkje så villige til å gå, noko som ga ei utfordring for mønstrarane.

Vanskeleg å skilja

– Det er viktig å følge med på dommaren, stille kalven i åpen posisjon, aller helst gå bakover når du leiger kalven. Ikkje gløym å smila til dommaren, oppmoda Anna Kirstine Aarsland, som var dommar i begge kalvemønstringsklassane.

Dommaren fekk ei vanskeleg oppgåve, men ho merka seg enkelte barn som hadde eit ekstra godt lag med kalven, og som i tillegg hadde kontroll på dommaren sine signalar.

Amalie og Anine

Blant dei yngste, var det 6 år gamle Eirik Bergland Mælandsmo som kom på ein flott 3. plass. Storesøster Kristin på 9 år kom på ei sterk 2. plass. Dei to hadde trent mykje og hadde god kontakt med kalvane sine.

10 år gamle Amalie Dyvik og kalven Anine, vart til slutt kåra som vinnarar av klassa, og Anine vart pynta med sløyfe som eit minne om dagen.

Heidi og Tone

Blant dei eldste mønstrarane vart deltakarane utfordra til å bytta kalvar. Eit bytte som viser om deltakarane kan handtera andre kalvar, som var meir eller mindre trena, eller sløva av varmen.

Dommaren fekk med seg dei små detaljane, og kåra Liv Moen Dalviken, frå Heddal, og kalven Minni på ein 3. plass, og Malin Regine Fotland Øglænd frå Time, og kalven Klara på ein 2. plass.

Heilt til topps gjekk Heidi Skårland frå Time, og kalven Tone. Tone vart pynta med sløyfe. Dei tre jentene på dei første plassane er alle 11 år gamle.

Del på Facebook

Stikkord denne saka: husdyrutstilling, Kalv, Storfe