Luftvegsvirus spreier seg

Smitten spreier seg: PRCV er påvist for første gong i Norge. Mattilsynet sette straks i gong tiltak for å kartlegge, og for å hindre ytterlegare smittepsreiing. Måndag denne veka var talet på bekrefta smitta besetningar oppe i 17, alle i Rogaland og Agder. Illustrasjonsfoto.


Antistoff til det smittsame luftvegsviruset PRCV er påvist i minst 17 svinebesetningar i Rogaland og Agder. Korleis smitten har kome til Norge, er ei gåte.


Jane Brit Sande


– Funnet av PRCV-viruset for to veker sidan er det første i Norge. Viruset vart påvist av Veterinærinstituttet i samband med Mattilsynet sitt nasjonale overvakingsprogram for spesifikke virusinfeksjonar for gris, seier Odd Ivar Berget, avdelingssjef for Mattilsynet avdeling Sør-Rogaland, Sirdal og Flekkefjord.


Det er altså antistoff til PRCV, og ikkje eit sjukdomsutbrot som er påvist. Fredag for to veker sidan var smitten påvist i fem besetningar i Rogaland, med mistanke om smitte i ytterlegare to besetningar. Dei smitta besetningane er pålagt strenge restriksjonar i form av bandlegging, av Mattilsynet. I førre veke arbeidde Veterinærinstituttet og Mattilsynet med å ta nye prøvar.