Strandsvingel – kven bør dyrke det?

Rikesleg: Strandsvingel gir mykje avling utover hausten, og egner seg difor til haustbeiting med lam. Dette bildet er tatt 13. oktober. Det er andre runde lamma beiter dette stykket i haust. Foto:Turid Røysland


Dei siste åra har det vore ein del snakk om grasarten strandsvingel, ofte sorten Barolex. Men kva er eigentleg dette for eit gras? Kor eignar det seg? Og korleis skil det seg frå dei grasartane me kjenner frå før?


Ole Arnfinn Røysland Fitjar, NLR Rogaland


Strandsvingel er ingen ny grasart. Det har lenge vore sortar som Sway, Kora eller hybridsorten Hykor på marknaden. Desse sortane er kjent for å ha svært grove og stive blad med dårleg smak. Dei siste åra har nye mjukblada sortar blitt meir og meir vanleg sørover på kontinentet. Nokre av desse er òg importert til Noreg. Den mest kjende av desse er sorten «Barolex» frå frøfirmaet Barenburg i Nederland.