Romsleg fjøs for folk og fe

God plass: Med heile 1800 kvadratmeter i grunnflate, har Elin og Terje god plass til gode fasilitetar. Her er rekka med kalvingsgardar, dei har 12 stykk.


Terje Birkeland og Elin Fjellheim prioriterte god plass til å gi dyra ein god start på livet, då dei planla fjøset. Både folk og fe ser ut til å trivast med vala.


Jane Brit Sande


Terje Birkeland og Elin Fjellheim hadde fjøsopning med meir enn 200 vitjande i veka før Bondevennen kom på besøk.


– Det var så morosamt. Det kom både kjente og ukjente, og dei kom reisande frå begge Agder-fylka, seier Terje.


Han viser veg mot det nye fjøset på garden deira på Evje i Agder. Nytt er kanskje å ta litt hardt i, då det allereie er eit år sidan dei første dyra fekk koma inn. Terje og Elin har lagt ned mykje eigeninnsats i fjøset, og ville venta med opninga til heile fjøset var i bruk.

Føretrekk tre

Fjøset er bygd i tre, og måler heile 1800 kvadratmeter i grunnflate. Med naturleg ventilasjon og heile 11 meter under møne er det friskt og luftig innandørs.


– Elin og eg var samde om at eit nytt fjøs skulle vere i tre. Mjølkefjøset er også bygd i tre. Me likar estetikken og innemiljøet som tre gir, og det veg tungt, seier Terje.


Arbeidet med tomta starta hausten 2018. Bøndene ville unngå å ofra dyrka mark og beiteområde. Terje meiner at han har sprengt ut kring 5000 kubikk med stein. Fjøset er levert av Riska Sagbruk, og er bygd i deira patenterte laftesystem. Terje anslår at det er nytta mellom 7 og 800 kubikk med tømmer, alt frå produsentar i Rogaland og Agder.