Skånsam hogst i bratte lier

Bratt: Prestegardsfeltet på Fusa i Bjørnafjorden kommune, når ein tredel av hogsten er gjennomført. Neste steg er det bratte partiet over utbygde område, der ein må leggja ekstra omtanke i hogsten for å oppretthalde skogen sin sikringsfunksjon. Foto: S. Wolff


Hogsten i dei bratte fjellsidene i Fusa blir gjennomført med taubane, ekstra planlegging og omtanke.


Anne Rivenes, frilansjournalist


– Der skogen er sikring, er det uheldig å fjerne alt. Her må hogsten vera skånsam, understrekar Simon Wolff, rådgjevar innan skogbruk ved Bjørnafjorden landbrukskontor. Kontoret yter tenester til Samnanger, Bjørnafjorden og Tysnes. I ei spørjeundersøking til dei om lag 1000 skogeigarane i dei tre kommunane, kom det fram ynskje om meir rådgjeving innan berekraftig skogbruk og informasjon om andre treslagval.


– Gran er produktiv og enkel å ty til. Andre treslag er kan hende meir krevjande, men samstundes kan dei innebera meir lokal verdiskaping, seier Wolff. Han meiner ein kan tidobla verdien av ein tømmerstokk ved foredling i regionen, i staden for eksport ut av landet. Med bakgrunn som møbelsnekker, veit Wolff at flotte lauvtre har stor verdi for møbel- og trevarebransjen.

Naturleg forynging

Lauvtre har også verdi og funksjon i vestlandsskogen, som klima- og sikringstiltak. I Bjørnafjorden er 50 prosent av skogsarealet brattare enn 30 grader, og skogen er med på å hindre jord- og steinskred. Denne våren gjennomfører seks skogeigarar hogst på oppsida av Prestegardsfeltet på Fusa i Bjørnafjorden kommune. Dei forventar å ta ut 3.500 kubikk, og Frivik Taubane AS står for drifta. I staden for å ta seg fram med store tunge maskiner, er det taubane og manuelt arbeid som gjeld.