Har ikkje ein bonde å mista

Krevjande: Fylkesleiar i Vest-Agder Bondelag, Tor Erik Leland, har hatt sin mest krevjande sommar som både tillitsvald og grovfôrdyrkande husdyrprodusent. Augustregnet har gjort godt på enga hans i Selandsdalen, men hjelper lite på det fôret han ikkje fekk tidlegare i sommar

Tor Erik Leland har sett yrkeskollegar på Agder fått furer i andleta og blitt mange kilo lettare i løpet av den tunge sommaren.


Sjur Håland

Leiaren i Vest-Agder Bondelag har hatt ein sommar han helst ikkje vil oppleva igjen. Regnet i august er langt frå nok til å berga fôrsesongen.


– Nei, alt er ikkje løyst med regnet. Regn hjelper ikkje for fôret me ikkje har fått.


I staden for nok fôr, har bønder på Sørlandet har fått dosen av motbør og vel så det siste året. Unnatakstilstanden starta med regnsommaren i fjor, som gjorde innhaustingstilhøva vanskeleg.


– Særleg frå august og utover. I tillegg fekk me storflaumen i oktober der ein del rundballar gjekk tapt, saman med matjorderosjon og tilslemming av jord der tredjeslåtten framleis stod på rot, fortel Leland.