Bygger nytt mjølkefjøs til 30 kyr

I gang: Erik Haraldseid Bleie har grunn til å smila. Bygginga er i gang. I desember skal mjølkeroboten vera i drift.


Medan enkelte tel på knappane kring mjølkekvoten og lurer på om forbrukarane i det heile kjem til å drikka mjølk i framtida, står betongbil og -pumpe i tunet til Erik Haraldseid Bleie. Der på garden bygger dei nytt mjølkefjøs.


Sjur Håland


Vindkasta feiar innover øya. Regnbøyene kjem på tvers. Erik Haraldseid Bleie (33) drar glidelåsen i den grå Nortura-dressen heilt opp under haka, reiser seg mot den sure januarvinden og smilar breitt.

30 kyr

I løpet av 2020 skal eit nytt tilbygg på plass på garden. I det nye uisolerte lågbygget blir det plass til 30 kyr i lausdrift pluss mjølkerobot og kviger og oksar. Nå er grunnarbeidet godt i gang.


– Målet er å kopla saman dei to bygningane i sommar medan dyra går på beite. Til hausten skal overbygget reisast, medan me reknar med at roboten sviv og fjøset er i drift i løpet av desember, fortel bonden.

Framtid som mjølkebønder

Det handlar om å realisere planane om ei framtid som mjølkebønder på Berge på Finnøy i Stavanger kommune. Slekt følgjer slekters gang. Ellen og Erik har ein toåring som heiter Erlend. Dei tok over garden frå Erik sine foreldre, Sissel og Odd Bleie, i 2018. Foreldra er framleis med i gardsarbeidet og bur i eine huset i tunet.


– Mor og far er avløysarar, rådgjevarar og gjer alt som me ikkje rekk å gjera sjølv, seier Erik, og held fram at også svigerforeldra, som bur i nabolaget, er med og hjelper til når det trengs.