Bollestad om beredskap

Krevjande tider: - Eg vonar det blir fleire, særleg byfolk, som ser kor viktig jobben til matprodusentane er, seier Landbruks- og matminister Olaug Bollestad. Foto: Liv Kristin Sola


Ho utelukkar ikkje beredskapslager av korn, men det sikraste me kan gjera er å byggja opp eigen produksjon, seier Olaug Bollestad, og insisterer på at me alt er sjølvforsynte med kjøt, mjølk og egg.


Bothild Å. Nordsletten


Koronakrisa har opna for debatt om matberedskap og sjølvforsyningsgrad, og landbruks- og matminister Olaug Bollestad har tilsynelatande mykje på hjarta. Smittesikre telefonintervju innbyr ikkje til mykje utanomsnakk - me går difor rett på sak.


– Frå ditt perspektiv som landbruks- og matminister - korleis vil du beskriva det me står oppe i no?


– Det er ein krevjande situasjon for landet og samfunnet. Så langt går det bra med matproduksjonen, stoda er bortimot normal i vårt eige land. Eg vonar det blir fleire, særleg byfolk, som ser kor viktig jobben til matprodusentane er.


– Kor godt budd meiner du landbruket så langt har vist seg å vera?


– Landbruket er ekstremt flinke og har erfaring frå kriser frå før, som tørkesommaren i 2018, noko som kjem til nytte no. Bondelaget har vore gode til å oppmoda kvar gard om å laga ein risikoanalyse. Så har næringa lang erfaring med smittevern. Det er kjempeflott å oppleva. På den andre sida er me jo sårbare når det gjeld utanlandsk arbeidskraft.


– Koronakrisa avdekker kor sårbart matsystemet vårt er. Korrigert for kraftfôr er Noreg om lag 40 prosent sjølvforsynt. Er det nok?


– Sånn i utgangspunktet er me opptatt av å få ei større forsyning. I 1970 var me null sjølvforsynte på korn. I fjor hadde me 60 prosent eige korn. Så er me sjølvforsynte på kjøt, egg, mjølk. Samstundes har me lagt til rette for å bruka eigna areal til korn og produsera gras på areal som er eigna til det.