Bønder slåst mot datasenter på matjord

Ikkje til sals: Kirsten Kverneland t.v. og Anne Frøyland Grødem frontar jordvernet og vil heller leggja eit eventuelt datasenter på fjellgrunn der landbruksjord ikkje blir berørt.


Seks tusen dekar i Time kommune på Jæren kan bli omregulert til næringsområde for eit datalagringssenter. Av dei fjorten grunneigarane som kan bli råka, har tre kvinner stått fram og vil verne jorda. Bondevennen har møtt to av dei.


Sjur Håland


På Kalberg i Time bygger Statnett ein ny trafostasjon som skal ta i mot meir straum til Rogaland frå nye høgspentlinjener frå Lysebotn. Berre trafostasjonen legg, i følgje Stavanger Aftenblad, beslag på 207 dekar. Nå er det planar om å også nytta den nye straumbasen på Kalberg til ny kraftintensiv industri. Aktørane som ivrar etter å utvikla området, Green Mountain og Lyse, hevdar at satsinga på eit nytt datalagringssenter vil kunna lokke til seg internasjonale aktørar som Facebook, Google og Microsoft til området. Aktørar som er ivrige på å utvikla området anslår at det kan koma mellom 6.000 – 10.000 arbeidsplassar til området. Ikkje alle jublar over planane.


Les også: – Dette er uhyggeleg

340 mål

Sørausten feiar friskt inn i tunet på Anne Frøyland Grødem sin gard på Frøylandsfeltet. Våronna er så vidt i gang. Om graset grønkar i bakkane, blinkar det eit raudt lys for framtida. Garden er aktuell for omregulering til det nye næringsområdet. Arealet målar 340 dekar. Av dette er 260 dekar dyrka. Ho og mannen, Tor Bjarte Grødem, og dei fem barna driv også ein gard i Time-grenda nokre kilometer unna. På Frøylandsfeltet blir jorda nytta til grasproduksjon og beite. I dette fjøset har dei ungdyra, medan mjølkekyrne er på den andre garden.


– For meg er engasjementet først og fremst knytt til jordvern. Eg meiner sterkt at me er plikta til å ta vare på matjorda og potensialet til å produsera mat. Norge treng meir mat, me har som kjent låg sjølvforsyningsgrad, seier ho.