Byggjer alliansar for byjorda

Ei endring: Kampen for Egsjordet er blitt eit symbol på endring i Kristiansand. Endeleg er jordvern tydeleg på den politiske agendaen. Her er bonde Magne Thorvald Bakken (t.v.) og leiar i Bondelaget i Kristiansand, Gunnar Hangeland (t.h.), saman med Knut Erik Ulltveit, leiar i Agder Bondelag, på Egsjordet ein vinterdag. Foto: Kjartan Bjelland


Bøndene i Kristiansand er klare for å kjempa for matjorda i kommunen, og opplever ei bølgje av velvilje.


Jane Brit Sande


– Kristiansand har vore ein typisk «by», der politikarane har vore mest opptekne av by– og næringsutvikling. Tanken for jordvernet har vore beskjeden, seier Gunnar Hangeland. Han har vore tillitsvald i landbruket i ei årrekkje, og har i fleire periodar frå 1980-talet og fram til i dag vore leiar i Bondelaget i Kristiansand.

Jordvern inn i arealplanen

Etter valet i 2019 fekk Senterpartiet i Kristiansand gjennomslag i koalisjonen for at det skulle lagast ein eigen jordvernplan i samband med den nye arealplanen i kommunen.


– Arealplanen er ute til høyring i desse dagar. Bondelaga i Kristiansand kommune har sjølvsagt gått saman om eit høyringssvar, seier Hangeland.


– Me vil ha areal tilbakeført til LNF-område. Det er snakk om kring 300 dekar som er omregulert, men framleis blir drive som landbruk. Det er ikkje sikkert det er aktuelt å bygga der i det heile, og derfor vil me endre statusen, seier han.


Det er snakk om blant anna god landbruksjord på Tangvall, like ved sentrum i Søgne, og rundt sentrum i Kristiansand, seier bondelagsleiaren.


– Det er bondelaga lokalt som har best oversikt over jordbruksareala i kommunen. Me kan peika på kva som er viktig, og har kunnskap om kva jord som er av god kvalitet, seier Hangeland.