Dyrkar gras utan glyfosat

Utan glyfosat: Kolbjørn Anda driv økologisk mjølkeproduksjon og har ikkje brukt glyfosat eller andre sprøytemiddel dei siste 20 åra.


Ei eventuell utfasing av verdas mest brukte plantevernmiddel, glyfosat, vippar ikkje Kolbjørn Anda av pinnen. Bonden har greidd seg utan sprøytemiddel i 20 år.


Sjur Håland


På kjelvene hans i Randaberg er grasveksten frisk og frodig, med tydeleg innslag av nitrogensamlande kløvervekstar. Sist i september står framleis 80 dekar med økologisk eng og ventar på lagleg haustevêr.

Droppa korndyrking

Buskapen består av 500 slaktegris gjennom året (konvensjonell drift) og økologisk mjølkeproduksjon på 28 årskyr. Nær halvparten av mjølka blir levert til Stavanger Ysteri. For inntil få år sidan dyrka han også økologisk korn. Det var ikkje kveka som fekk han til å slutta.


– Nei, eg droppa korndyrkinga mest på grunn av utfordringane med vêr og haustefôrhold. Men eg ser klart dilemma med kvekekamp i korn utan glyfosat. Alternativet blir gjerne meir pløying og open åker gjennom vinteren. Det er ikkje ideelt verken for åkerjorda eller miljøet.


Anda trur bønder som driv med korn og grønsaker vil streva meir med konsekvensane av eit eventuelt glyfosatforbud enn bønder som dyrkar gras.