– Jordbruket fomlar

Set ord på alvoret: – Me har ein atmosfære rundt jordbruksproduksjonen som er veldig tung å snu. Den krev først og fremst at næringa sjølv og Sp er tydelege. Det har me ikkje vore. Og det er dramatisk, seier Per Olaf Lundteigen. Foto: Morten Brakestad / Stortinget


Korkje faglaga eller Senterpartiet er godt nok budde på vårens jordbruksoppgjer, meiner Sp-nestor og stortingsrepresentant Per Olaf Lundteigen.


Bothild Å. Nordsletten


– Me er altså i ein svært alvorleg situasjon.


Roen og trykket på kvart ord i Per Olaf Lundteigens resonnement etterlet liksom ingen tvil. Våren 2022, få veker før jordbruksoppgjeret, står alt på spel for bonde og samfunn.


– Korleis vil du omtala status norsk jordbruk innfor tingingane?


– Forventingane er høge. Det finst ei tru på at regjeringa skal ta stoda på alvor og gi framtidshåp. Dei som har investert mykje siste 20 åra er i ein veldig usikker situasjon fordi marknadsprisane har auka så lite. Ein har blitt stadig meir avhengig av løyvingar over statsbudsjettet og av låge renter, billeg kraftfôr, og i mange tilfelle utanlandsk, tilfeldig arbeidskraft.