Kalvemønstring Jærmessa 2015

Superklar! Fire sløyfer og fire veninner. Live f.v., Seline, Adine og Rikke er alle full av håp om å vinna eit av stasbanda, men det er berre eit band i kvar av dei fire klassane. Seline, Live og Rikke er alle 9 år om må kjempa i same klasse. Adine er 10 og skal konkurrera med seks andre på 10 og 11 år. Live låner ut kalvar til dei tre veninnene sine.
Dei unge mønstrarane kjem til Varhaug fulle av forventning, kalvane er fulle av forvirring. Men god trening i forkant gjer at kalvane tek det heile med ro og stolar på dei unge eigarane sine. Her er Tina, kalven til Annelin Helland.
Elida Herrebrøden (6) kom med kalven Julianne. Ho har trena fleire kalvar, men er svak for dei kalvane som er heilt kvite.
I klassa for dei aller yngste, frå 4-7 år, var det tre deltakarar. Dommar Siv Hilde Rangen snakka med kvar ein av dei. Her er det Jon Emil Helland (4) og kalven Lolly, som har ein prat med dommaren.
Annelin Helland er 6 år, og mønstrar kalv for første gong. Heime på garden har ho mange kalvar. Annelin plukka ut kalven Tine, som ho har trent og temma for å ha henne med seg til Varhaug på mønstring.
Kjempefin innsats av alle dei tre deltakarane. F.v. Elida med kalven Julianne F, Jon Emil med kalven Lolly, og Annelin med kalven Tina. Dommaren var imponert, men måtte velgja ein vinnar.
Jon Emil vart kåra til vinnar, med Annelin og Elida på delt andre plass. Kalven Lolly oppførte seg heilt eksemplarisk, og Jon Emil hadde full kontroll.
Elida mønstra kalv på Jærmessa første gong då ho var 4 år. No er ho seks år, skulejente, og ein erfaren mønstrar. Alle deltakarane får flotte deltakarpremiar, og eit Geno-nett til å premiane i.
Jon Emil og Lolly på veg ut av ringen. Ein erfaring rikare, og klar for nye utfordringar.
Dommar Siv Hilde fekk assistanse av søster Lene Iren, til å halda oversikten over gjengen.
Litt mat må til for å yta sitt beste. Denne gjengen kom tidleg til Varhaug, og venta spent på sin tur i ringen. Dei med hattar er f.v. Helle Rosland, Lukas Ueland og Sebastian Ueland. Alle tre mønstra i klassen 8-9 år.
Ein fin plass å vera, godt plassert midt mellom kalvar, kostar, grimer og høy.
Far og son prat, før start. Dagen før vart far, Ole Morten Aanestad, og kua Callo kåra til Miss Jæren. Storesøster Oda Elise, mønsta si eiga ku, Ice, i Derbyklassa i går. I dag er det Bjørn Ole sin tur. Bjørn Ole er 8 år, og skal mønstra kalv for første gong.
Benedikte Anda har med seg kalven Minni. Ho har og med seg lillebror Adrian, og heile resten av familien. Benedikte er 9 år, og mønstrar på Varhaug for andre gong.
Før start fekk dei som ville, ta med seg kalven og trena litt på å gå i ringen. Rita Moen (9) hadde med seg Frida på nokre rundar.
Klassa 8-9 år var den største, med 13 deltakarar. Med så hard konkurranse, vart det delt ut fem premiar. Etter oppstilling, plukka dommaren ut Odin Trane F Øglænd, Rita Moen, Lukas Ueland, Rikke Herigstad Aanestad og Bjørn Ole Aanestad. Dei fem fekk gå ein finalerunde, før dommaren avgjorde plasseringa mellom dei fem.
Heilt til slutt stod det mellom Rikke (9) og Bjørn Ole (8). Dommar Siv Hilde gjekk for å klappa på kalven til vinnaren.
Ein stolt vinnar fekk stasband rundt kalven og flotte premiar.
Ei minnerik helg for familien Aanestad på Varhaug, som kan fylla opp heimen med stasband og premiar, både for kyr og kalvar.
Rikke er ikkje frå gard, men har lånt kalv av veninna Live Skretting. - Sjå på pelsen til kalven, seier Rikke, og lurer på om eg kan sjå noko spesielt.
I pelsen på dyra kan det somme tider dukka opp spesielle teikningar.
Det er ikkje berre kyr som skal ha rufsete hale. Heidi Skårland (11) mønstrar kalv for første gong, men ho har fått med seg korleis det går føre seg. Ho har med seg både kost og spray for å fiksa halen på Tone.
Oppstilling i klassa 10-11 år. Denne klassa hadde 8 deltakarar. Fleire av dei har vore med mange gonger, og konkurransen er hard. Spenninga stig medan dei ventar på at dommaren skal plukka ut dei tre som får gå ein finalerunde.
Amalie Dyvik, Maria Skretting og Einar Østebøvik var dei tre som imponerte dommaren aller mest. Dei tre måtte gå nokre ekstra rundar før dommaren kunne avgjera plasseringa mellom dei.
Einar har god kontroll på kalven, Sofie M. Han veit at det er viktig å følgje med på dommaren. Full konsentrasjon må til for å gjere det lille ekstra som skal til for å vinna klassen.
Adine Ridola Haugstad har også lånt kalv av Live Skretting. Adine og kalven Olyssus var eit godt team i ringen, og var strålande fornøgd etter innsatsen på si første mønstring.
- Yess!, utbraut ein glad og letta Einar då dommaren klappa på kalven hans. Det synlege teiknet på at han og Sofie M, vart kåra til vinnar i si klasse.
Maria Skretting har vore på kalvemønstring på Jærmessa fleire gonger. I år vart ho og kalven nummer to i si klasse, 10-11 år.
Johan Aarsland (12) prøver å få kalven Amalie, til å smila like breitt som han sjølv.
Amalie Egeland er full av forventning før start. Ho er 12 år, og skal konkurrera med 7 andre frå 12-15 år.
- Eg gler meg, men er kjempenervøs, sa Vilde før start. Vilde Varhaug mønstra på Jærmessa for første gong. Ho har trent mykje med kalven som ho låner av Helland Holstein, og har kontroll på det ho skal gjera.
Oppstilling etter finalerunden i klassa 12-15 år. f.v. Marianne Hagen med kalven Sofie M på 3. plass og Veslemøy Østebøvik med kalven Nim Z på 2. plass. Vinnar av klassa vart Vilde Matningsdal med kalven Martha.
Vilde har lang erfaring med ustiling, og mønstrar både kyr og kalvar. Men erfaring gjer ein ikkje mindre spent og nervøs, og Vilde var letta og glad så ho stod att som vinnar av klassa.
Etter at konkurransen er over, vert mange av kalvane ståande i hallen ei stund. Tamme, nypussa kalvar som er trøtte etter å ha prestert i ringen, tek gjerne imot kos og gledesutbrot frå ungar som ikkje er vane med å sjå dyr på så nært hald.
Kalvemønstringa på Jærmessa er eit godt høve for ungar og vaksne, til å koma i kontakt med dyr på nært hald. Ei oppleving som ikkje er for alle no til dags, sjølv ikkje i husdyrkommunen, Hå.
Ein pust i bakken og litt kvalitetstid, for Magnus Aarsland og Stjerne.

Søndag 30. august var det klart for eit nytt høgdepunkt på Jærmessa. 31 kalvar, og like mange barn i alderen fire til femten år, var samla til kalvemønstring.

Liv Kristin Sola

For mange var det første gong, andre har lang erfaring. Forventningane var like stor hjå alle, og ikkje minst hjå stolte foreldre som må stå på sidelinja når dei håpefulle leier kalvane rundt i ringen.

Godt førebudde

Mønstrarane viste at dei hadde god kontroll på korleis dei skal handtera kalven, og smila til dommaren. Når dommar, Siv Hilde Rangen, ba om at dei skulle stoppa, stilde deltakarane kalvane sine opp i open posisjon. Dei unge var klare til å svara på spørsmål då dommaren tok runden for å snakka med alle.

Mønstrarane kjenner styrken og svakeheita til kalvane sine, og håpar at dei skal visa seg frå si beste side i ringen. Skuffelsen er stor når kalven plutselig streiker, legg seg ned, og ikkje vil meir, eller plutseleg finn på at dei vil springa rundt i ringen, forbi alle andre, helst utan leiar. Heldigvis oppførte dei aller fleste kalvane seg heilt eksemplarisk.

Utfordrande å dømma

Deltakarane var så flinke, at dommar Siv Hilde, fekk ein utfordrande jobb. Ho har sjølv mønstra kalv sidan ho var lita, og seinare kviger og kyr. Siv Hilde har også vore i Belgia på EM i showmanship. Ho kjenner forventningane på kroppen, har kjend på skuffelsen av å ikkje nå heilt til topps, men også på gleda av å vinna.

Mange premiar

Ikkje alle kan vinna og få stasband, men alle får dipom, sløyfe og pokal, og eit krus frå Geno. Frå Geno får dei også eit nett, sånn at deltakarane kan halda styr på alt. Dei har tross alt ein kalv som skal leiast ut av ringen.

Del på Facebook

Stikkord denne saka: Kalv, Mjølkeproduksjon