Skal vurdera mineralgjødselavgift

Avgift: Landbruks- og matdepartementet skal i tråd med Klimaplan 2021-2030 greia ut ei innføring av mineralgjødselavgift. Foto: Bjørn Georg Øie


Styresmaktene skal vurdera innføring av avgift på mineralgjødsel. Anders Rognlien i Yara er skeptisk og meiner den kan påføra norske bønder store utgifter.


Sjur Håland


– Me treng ikkje ei avgift som ikkje verkar. I staden trengst positive stimuli for å ta i bruk ny teknologi til presisjonslandbruk og energieffektivisering på gardane, seier Rognlien.


Frå Landbruks- og matdepartementet får Bondevennen stadfesta at ei utgreiing av mineralgjødselavgift er på trappene. Andre spørsmål vil dei ikkje svara på.


– Arbeidet har ikkje starta opp enda, så me kan ikkje seia meir nå, heiter det i ein e-post frå pressevakta i departementet.

Vil redusera lystgass

Oppdraget er varsla i klimameldinga, Klimaplan 2021-2030. Her kjem det fram at regjeringa vil greie ut effektar og konsekvensar av ei avgift på mineralgjødsel, og korleis ei slik avgift eventuelt kan innførast. «Føremålet med ei eventuell avgift skal vera å redusera utsleppet av lystgass», heiter det i klimameldinga.