Vestlandsk raudkolle er trendy

Ammeku på bås: Ein lang beitesesong er over og Knut Thunheim har fått dyra sine på bås. Bingane er fylt opp av dyr, mange av dei skal seljast til liv. Kalvane som framleis syg mjølk får gå lause og har god plass på bakgangen.


Kjøtforedling, robotmjølking og livdyrsal. Moglegheitene for dei som vel å satse på gamle storferasar er minst like mange, som det er i meir kommersiell drift.


Liv Kristin Sola


– Det er spennande å få vere med på heile prosessen, frå dyret kjem til verda til ferdig produkt, og så møte kunden direkte, seier Magne Sæstad på Løyning gard på Eigerøya.


Løyning gard var eit av tre bruk som fekk besøkt då Urfe SA inviterte til fjøsrunde og seminar om dei gamle landrasane i midten av oktober. I tillegg til Sæstad, gjekk turen innom Caroline Silje Handeland og Hans Arne Haugland på Haugland Gård og Hage i Hovsherad, og til Knut Thunheim på Moi, leiar av Laget for Vestlandsk Raudkolle. Tre bønder med same rase, men med tre ulike fjøs og driftsopplegg.