For dyrt med biogass?

For mykje gjødsel: Blir Miljødirektoratet sitt krav på maks 2,1 kilo fosfor tilført per dekar vil gjødseloverskotet i Rogaland utgjera 1,9 millionar tonn husdyrgjødsel. Omrekna i tørrstoff blir talet 280.000 tonn. I utrekninga er innkjøpt fosfor frå mineralgjødsla på 400 tonn inkludert. Foto: Thea Hjertuslot.


Kan kollektiv handlekraft berga rogalandslandbruket mot konsekvensane av ny og strengare gjødselvareforskrift?


Sjur Håland


Den samfunnsøkonomiske prislappen med å ta unna overskotsgjødsla gjennom biogassanlegg er i ein Nibio-rapport estimert til 13 milliardar kroner i Rogaland.


– Dette kan få store privatøkonomiske kostnadar for husdyrprodusentar i Rogaland, seier Nibio-seniorforskar Siri Voll Dombu.


Førebels er ingen andre svar hogde i stein, utanom dette; det er bøndene i Rogaland som verkeleg får røynt seg om det blir ei innskjerping i gjødselvareføreskrifta. Også etter siste møtet i regi av Rogaland Biogassnettverk førre veke, heng dei ubesvarte spørsmåla i lufta som gjødseltåke over Jæren om våren. Møtet gav eit inntrykk av ei næring som famlar etter dei tydelege svara og prisen på dei ulike løysingsalternativa. Uvissa rår framleis, sjølv 10 år etter dei første signala om at det vil koma ei revidering av føreskrifta.