Takk for maten!

Ei viktig del av aktiviteten i Klepp, Bore og Orre Bondelag, er å halda god kontakt med lokalpolitikarane. Kveldens måltidet var ein ny variant for å få til ein god dialog i kampen om å ta vare på matjorda og landbruket i kommunen. F.v. KokkenPetter Kirkhus, og bøndene Marianne Jåtten, Bengt Stangeland, Arthur Salte, John Erga og Jan-Arild Anda.
Gode råvarer er avgjerande for det gode måltidet. Kjøtsuppa som vart servert inneholdt kjøtt frå grasfôra kastratar, potet, persillerot, gulrot og kålrot og kål, smakssett med ferske tomater og frisk timian, Alt levert av produsentar i Klepp kommune. Salt, pepar og kvitlauk måtte "importerast".
Pannacotta til dessert, laga av mjølk, fløyte og yoghurt. Økologisk mjølk frå Jerseykyrne til Åslaug og Lars Kristian Grude. Noko vart separert til fløyte og noko vart syrna til yoghurt, for å få fram ingrediensane til pannacottaen. Sausen er laga av aronia frå Sven Dysjaland. Sitronmelisse frå Kryddergården.
Det vart ein lang dag over grytene for kokken og dei to gode medhjelparane, Marianne og Bengt. Heile dagen gjekk med til å krella, kutta og koka. Kraft frå bein og knokar kokt natta over, og langtidskokte kjøt på svak varme. Det kjennes igjen på smaken.
Petter, som til dagleg jobber som kokk på Edeståvå til Håland Kjøtt, presenterte menyen og leverandørane som har bidratt med råvarer.
Rundstykker var bytta ut med kjøttsuppe og pannacotta. Bøndene vil understreka at det er politikarane sitt ansvar å prioritera matproduksjon i ein av landets mest aktive landbrukskommunar.
Etter ei noko amper stemning under debatten om kommunesamanslåing, kunne politikarane senka skuldrane og fokusera på det me alle lever av, mat.
Pannacotta med aroniasaus, for dei folkevalde til å forsyna seg.
Senka skuldre og ein god drøs over eit godt måltid, laga av råvarer produsert innafor kommunegrensene. - Dette var godt. De kan berre notera dykk møtekalenderen framover, var kommentaren frå politikarane.
David (16), frå Axis Ungdomskultursenter i Klepp, har ansvar for liveopptaka som går ut via kommunen sine nettsider. Han er med på kvart kommunstyremøte. David var ikkje spesielt interessert i politikk før han vart involvert gjennom Axis, men innrømmer no at enkelte saker både interesserer og fenger han. - Det er jo me som er framtida, seier han.
– Tenk at alt dette er produsert i Klepp. Imponerande, sa ordføraren, og takka for maten. F.v. Ordførar Ane Mari Braut Nese, Knut Sigmund Lende, John Tore Refve, Arthur Salte, Jan-Arild Anda, John Erga, Petter Kirkhus (kokken) og Bengt Stangeland.
Dei folkevalde er tilbake til debatten i kommunestyresalen, og Sasitorn (16), fra Axis, står att med oppvasken og ryddinga etter måltidet. Som David, er også Sasitorn med på kvart kommunestyremøte, der ho i lag med ei venninne, har ansvar for maten og kjøkkenet.

Matlukta nådde heilt inn i kommunestyresalen, der politikarane diskuterte samanslåing med nabokommunane, Time og Hå.

Liv Kristin Sola

Dei tre Bondelaga i Klepp kommune på Jæren (Klepp, Bore og Orre), inviterte dei folkevalde til bords, til ei smakfull suppe med råvarer frå kommune.

Kva er Klepp utan landbruk?

– Landbruket var før alt anna her i kommunen, og skal overleva alt anna. Me må ta vare på ressursgrunnlaget, den dyrka jorda, var John Tore Refve si klare melding til dei folkevalde.

Bøndene ville løfta fram dei lokale råvarene, og visa kva landbruket betyr for ein kommune som Klepp.

Alt interkommunalt

– Grønsakene har me fått frå produsentar på rundt om i kommunen. Kjøtet, stjerna i suppa, er frå kastratane til Bengt Stangeland. Kastratar som dei siste seks månadane før slakt, berre har hatt beitegras som fôr, sa kokken, Petter.

Av ingrediensane var det berre kvitlauk, salt, pepar, vanilje, sukker, gelatin og sitron, som av naturlege årsakar ikkje var produsert innafor kommunegrensene, kunne kokken opplysa.

Til desserten fekk dei økologisk mjølk frå jerseykyrne til Lars Kristian og Åslaug Aasland Grude, og aronia frå Sven Dysjaland.

– Me er glad med nytta kokk til å planlegga og gjennomføra kokinga, kommenterte Marianne Jåtten, som var ein av dei som brukte heile dagen over skjerefjøla og grytene.

Frå ampert til smidig?

Ordførar Ane Mari Braut Nese la ikkje skjul på stemninga blant dei folkevalde var noko amper under ordskifte. Fakta og kjensler, identitet og framtid var ingrediensane, då ein komande storkommune på Jæren stod på dagsorden.

Politikarane gjekk mette og smilande attende til plassane sine. Om kleppråvarer sett i system, vippa saka den eine eller andre vegen, er uvisst.

– Me eig ikkje jorda, men forvaltar den for neste generasjon, sa John Tore Refve, leiar av Bore Bondelag.

Bondelaga fridde til politikarane, og lova eit varmt måltid for kvart dekar dei tok ut av reguleringsplanane. Det står att å sjå kor travelt bøndene vil få det med å passa grytene framover.

Petters Pannacotta med aroniasaus

Til 6 personer

3 dl mjølk

3 dl fløyte

4,5 dl yoghurt

1 vaniljestang

150 gr sukker

4 pl. gelatin

Kok opp mjølk, sukker og vanilje. Blaut opp gelatinplatene, og sett dei til mjølka når ho er kokt opp. Sil mjølka og bland i yoghurt og fløyte. Hell i porsjonsskåler og sett til kjøling i 4 timar.

Aroniasaus:

500 gr. aroniabær, 50 gr. sukker og saft frå ½ sitron blandes og varmes opp. Sil sausen før den helles (avkjølt) over pannacottaen.

Del på Facebook

Stikkord denne saka: Landbrukspolitikk, Lokalmat, Mat