Bladgras er viktig i eng til sauebeiting

Ved varierande overvintringsforhold bør ein velje timoteibaserte blandingar med Hykor eller ekstra engrapp for å sikre vårbeite. Gode overvintringsforhold utnyttar ein best med bladgras, særleg på areal som skal haustbeitast.


Synnøve Rivedal og Liv Østrem, NIBIO avdeling Fôr og husdyr


Det er utfordrande å få eng til å tole beiting vår og haust, i tillegg til ein eller to slåttar. Sidan timotei går lett ut ved beiting, bør ein auke delen av bladgras i frøblandinga til kombinasjonsbruk, sjølv om mange av bladgrasa har dårlegare overvintringsevne. Vi ville teste avling og kvalitet av ulike blandingar av artar og sortar i eit driftsopplegg med fleire beitingar og slåttar ulike stader i landet.