Fleire ammekyr på Agder!

Godt selskap: Sidan prosjektstart i 2013 har det blitt 96 fleire ammekubruk på Agder, og tal mordyr har auka med 2089. Foto Jakob Saaghus


Det nyttar å satse. NLR Agder ligg godt an til å nå målet om 1000 fleire ammekyr i regionen.


Jakob Saaghus og Inger Birkeland Slågedal, NLR Agder


Jordbruksarealet på Agder eigner seg særs godt til produksjon av storfekjøt, med inn- og utmarksbeite som kan nyttast på ein berekraftig måte. I 2013 gjekk NLR Agder i gang med eit storfekjøtprosjekt i Aust-Agder. Det var då ei underdekning på 10.500 tonn storfekjøt på landsplan, og det grovfôrbaserte husdyrhaldet i fylket var redusert med 22 prosent frå 2000 til 2010 målt i tal storfeeiningar. Frå 2017-2020 førte me vidare prosjektet og utvida til å omfatte heile Agder med mål om å auke tal ammekyr med 1000 mordyr og tal kilo storfekjøt med 20 prosent i prosjektperioden. Dette i samarbeid med TYR, Nortura, Tine, faglaga og den kommunale landbruksforvaltinga. Grovfôrrådgivar Jakob Saaghus var prosjektleiar fram til årsskiftet, då overtok Josefa A. Torp ansvaret.

Plass til fleire i indre strok

Statistikken syner at målet om 1000 fleire ammekyr på Agder ligg godt an til å bli nådd. Kurva viser at sidan prosjektstart i 2013 har det blitt 96 fleire ammekubruk på Agder, og tal mordyr har auka med 2089.