Grovfôrpris i eit kriseår

I eit kriseår er det nesten alltid god økonomi å skaffe seg fôr nok til å behalde produksjonsdyra.


Aslak Botten, NLR Østafjells


Fôrmarknaden i år er svært oppheta og i ubalanse. Dette fører til at prisane flyg i vêret og nærmar seg grensa for kva det er lønsamt å betale for innkjøpt fôr. Likevel er verdien av å oppretthalde buskapen (mordyra) svært høg. Marginane er størst på mjølkekua. Talet på mordyr påverkar produksjonen og dermed inntektene i fleire år framover. Lønsemda i kjøp av fôr i eit kriseår må vurderast over ein tre til femårsperiode, og lønsemda med fôrkjøp går ned om me får fleire kriseår på rad. Vel du å slakte ned buskapen i år vil som oftast årets slakteoppgjer og eventuelt neste års sal av fôr, generere lågare inntekt over ein femårsperiode enn å oppretthalde produksjonen.