Meir heimeavla fôr: Ole Magnar jobbar for at mest mogleg av fôrrasjonen skal bestå av heimeavla fôr. – Det er viktig både med tanke på klima og økonomi, seier han.

Sunt bondevett og moderne teknologi

Ole Magnar Undheim nyttar kukontrollen når han skal planlegge produksjonen og informasjon frå roboten er eit uvurderleg hjelpemiddel i den daglege drifta.


Liv Kristin Sola


Det første Ole Magnar Undheim gjer når han kjem i fjøset, er å sette seg framfor datamaskinen. Her får han god oversikt over kyrne sin aktivitet og mjølking siste døgnet.

Kua gir svaret

Bonden ser etter kyr som er for seine til mjølking, sjekkar celletal og brunst. Det er ikkje uvanleg at nykalva kviger må hentast til mjølking før dei finn ut av rytmen – og kraftfôret, og går i roboten sjølve.
Vaksne kyr er meir sjeldan han må hente. Når det skjer er det eit lite varsku og bonden sjekkar aktivitet, temperatur, mjølkemengde og drøvtygging.


– Låg drøvtygging betyr at kua ikkje har ete normalt. Då må eg finne ut kvifor, seier Ole Magnar.


Etter å ha danna seg eit bilete går han inn i fjøset.


– Eg sjekkar kua, om ho tygger drøv, og sjekkar gjødselkonsistensen. Er den for blaut reduserer eg gjerne kraftfôret eit par dagar og ser om det betrar seg.