Vil ha billigare landbruksbygg

Visjon: Desse tre har eit felles mål om å dele kunnskap om rimeligare landbruksbygg med så mange som mogleg. (F.v.) Lars Bog, initiativtakar til prosjektet «Narvebygget», Astrid Brommeland, bygdeutviklar i Suldal, og Svein Narve Veshovda, bonden som har prøvd ut bygget i praksis i fleire år.


Eit splitter nytt byggeprosjekt ser dagens lys. Det utradisjonelle Narvebygget til prisen 1,5 millionar kroner.


Jofrid Åsland


– Eg prøvde å legge vekt på garden sine ressursar då eg skulle bygge nytt fjøs, og eg skulle ikkje bli gjeldsslave, fortel Svein Narve Veshovda, bonde i Eigersund i Rogaland.


Han er kjend for å ha eigne meiningar og tenkje utanfor etablerte tankebanar. Då Veshovda bygde ammekufjøset opplevde han at fleire flirte av opplegget hans. No haustar han lovord. Fjøset har fått namnet «Narvebygget» og skal formidlast som eit tilbod til andre bønder. Denne siste tysdagen i oktober kjem ein heil delegasjon frå landbrukskontor, entreprenørbedrifter og media til gards for å ta bygget i augesyn.