Slakt smart

Nortura ønsker ein større del av storfeslaktet første halvår og mindre om hausten. – Ikkje umogleg, men det krev bevisstgjering og planlegging, seier Asgeir Svendsen.


Liv Kristin Sola


Fagsjef storfe i Nortura viser til at etterspurnad etter storfekjøt og tilgang til slakt er i utakt. Etterspurnaden er størst om våren, spesielt frå påske til sommarferien, då innmeldingane er lågast. Underskotet vert dekka opp av import.


– Det går mot balanse i storfemarknaden. Då er det viktig at vi klarer å balansere tilbod og etterspurnad, seier Svendsen til Bondevennen.

Små justeringar

Sal av kjøt frå fryselager gir eit direkte driftstap i tillegg til at det reduserer prisen i marknaden. Folk vil heller ha fersk kjøt enn kjøt som har vore tint. Samstundes aukar presset på import om våren for å dekke etterspurnaden etter fersk storfekjøt.


– Jo betre vi klarer å balansere tilførsel gjennom året, jo større blir volumet for norsk produksjon, seier Svendsen.