Høgt celletal og mastitt

Ta speneprøvar: Ta speneprøvar av «celletalskyr» i god tid før avsining, og av kyr som må behandlast midt i laktasjon. Vær nøye med hygiene rundt uttak av speneprøven for å unngå at mjølka vert forureina. Foto: Tine/Bo Mathisen


Vegen fram til god jurhelse og lågt celletal kan verke både lang og bratt, men kunnskap er makt i kampen mot «kokkane».


Ingrid Vikshåland Lyngmo, veterinær ved Veterinærkontoret i Suldal


Å halda celletalet i tankmjølka nede på eit lågt nivå er inga enkel oppgåve. Det kan beint fram kjennast håplaust i periodar. Me er nok mange som skulle ønska det fanst ein enkel veg til eit lågt og stabilt tankcelletal og friske jur, frie for Staphylococcus aureus og andre smittsame mastittbakteriar. Heldigvis har me mange gode verktøy me kan nytta i den seige kampen mot bakteriane og deira øydelegging av jurvev. Og med verktøy tenker eg ikkje først og fremst på antibiotika.

Færre mastittbehandlingar

Heilt sidan slutten av 1970-talet har mastitt vore inkludert i samla avlsverdi for NRF, med auka vektlegging på jurhelse og mastitt frå 1990. I dei siste tiåra har det vore stor merksemd på optimal og målretta behandling av mastitt, samstundes som ein har forsøkt å jobba meir og meir førebyggande.